Olis obskuri Gedanke

Räge? Was isch räge?

2005-08-24T16:32:00.000+02:00

Ha ha, gället, i bi ne bösi!!! Es tönt mega krass was da i dir schwitz so ablouft, cha mers gar nid so vorstelle... Vorallem wil wir ja hie z troumhaft schönste wätter hei... di letschte 2 Täg am Strand si eifach hammer gsi!

Letschts wuchenänd isch o voll lustig hie, es isch ganz komisch, aber irgendwie verchrafteni hie nid so viel alkohl wie deheime! Ufjedefall bini am Fritig ganz lustig drufe gsi.. Und am Samstig simer ine hammer club gange, es würdi dir mega gfalle Nadia!

Bi o inere nöie Klass u es isch wieder voll ganz lustigi Lüt, üsi chlini schwitzer clique isch sich am erwiitere... d.h. eifach das mer jitzt ohno viel änglisch rede... lol, was wot me mache...

Und i bi voll entsetzt dass martina sushi nid gäre het, am Mäntig si mer wieder emal gange (es isch mis füfte mal gsi...) nume dis mal hei mer alli andere mitgschleppet u si öppe z acht gsi, de hei mer alli a chlei verschiedeni Sache chönne usprobiere!

Vor kulturelle Site vo Barcelona hani no nid viel gseh aber 1. hani scho viel gseh woni vor 2 Jahr bi da gsi u 2. hei mer ja no zyt, wi d Nati ging seit...

U claud, magsch di no errrinere das mer mal über z "neutrale schwitzer-dütsch" gredt hei u befunde hei es chönni nüt anders si als z Bärndütsch? Tja, dass gseht me öppe überall a chlei anders, d Nati behaupted stiff u fescht z neutrale schwitzer dütsch sigi dr Luzärner!!! Also, ich bitte dich... Das nenne ich illusione ha!

Ufjede fall,
muchos besos
oli

Rückblick ersti Wuche Barcelona

2005-08-16T16:50:00.000+02:00

Also, jitzt bini scho über a wuche hie und i ha dänkt es wär mal zyt Fazit z zieh:

1. I liebe ds Meer. Sehr, sehr fescht....

2. I wirde a Starbucks-Junkie. Was, das bini scho gsi? Nei, jitzt isches schlimmer worde, es het a Starbucks uf mim wäg hei und es vergeiht kei Tag woni mir kes Latte gang gah hole.

3. Ha scho ne mega grosse Büecherlade entdeckt. Scheibenkleister.

4. Ha dr no viel grösser Zara entdeckt. Schlächt. Zara het a mega grossi "Home" abteilig mit allerlei billigem, häzige Schnick-schnack für üsi Wohnig. Sehr schlächt.
(n.b. mini koffere het scho 21 kilo gwoge woni uf Barca bi gange)

Z Gäld het eifach nid so lang hie, es isch voll dr Fluech!!! I gloubs i chume hei u bi de im minus....

Uf de positive Site, mit de andere drü isches ging no mega lustig, mer hei voll z fest zäme.

U für die wo mi wei cho psueche, z erste September wuchenänd, d.h. 2.-4. September isch scho mine Eltere vergäh... Aber süsch mäldet nech eifach, di andere hei o ging mega vil Lüt wo si cheme cho psueche und i kenne Barcelona jitzt de so richtig guet, brucht nume no es paar Tag (wos dr best Sangria giht hani scho usegfunde!)

Salsa kurs isch leider nüt gsi da är in 2 Teili glideret isch u am fritig es scho zum 2. mal het statt gfunde. Aber Nicole und i hei nus gseit das mer de disi wuche göh, de hei mer ja öppis zum druf freue...

Hasta Luego!

No meh News!!!

2005-08-11T16:15:00.000+02:00

Es hört eifach nid uf!

Also zerst emal möchtich o mir u dr Nadia gratuliere, wir hei natürlich a super bewärbig gschribe u deshalb hei mer o üsi super wohnig becho. Wir si eifach scho genial, bi ganz beidruckt.

Zwöitens muess iech säge dass iech, ganz blöderwis, mi akku uflade grätli deheime vergässe ha. Sehr närvig. Drum bini a chlei schwer z erreiche. Mini eltere heis mer zwar am mäntig uf d post tah aber i ha kei ahnig wen es a chunnt. Oder ob es a chunnt. De müessti es neues choufe u das würdi ganz schön aschisse.

Nadia, bi gar nid erstunnt das nimer mit dier am Fritig ats Menuhin wot cho, i wär cho, schad das es nid a wuche früeher isch gsi!!!

Gester si mer ganz fein gah ässe u när öppe bis am zwöi i usgang. Länger hani nid möge, süsch hetti nid ufmöge u mini deberes hani o no nid gmacht khabe. Das es Deberes git het mi o no erstunnt, aber eigentli isches ja logisch. Hüt am füfi göh mer ane Salsa Kurs für anfänger, wird sicher ganz lustig.

U no zu mire verteidigung, i bi no nid huere gah shoppe!!!! Da warteni scho uf di, Nadia! (bi ja nid total ego...)

I bi scho gspannt ufs weekend, anschinend gits es mega festli z Barcelona, wos voll abgeiht. Am mäntig isch fiirtag, de hei mer kei schuel was natürli huere geil isch.

lg oli

¡¡¡¡Barcelona!!!!

2005-08-10T13:55:00.000+02:00

Hey leute!

Geihts nech guet? Mir isches sehr wohl hie in Barcelona, geili stadt!

Bi am sunntig oppe am füfi a cho u ha d wohnig vo mire madame ohni problem gfunde. Am afang isches a chlei komisch gsi und i ha scho a chlei heiweh cha aber sobald d schuel agfange het am ´mäntig isches voll easy gsi. Ha drü voll nätti mádels kenneglernt vo luzärn u zürich. Da fragts sich zwar ob i nid meh züri dütsch lehre als spanisch aberes isches gaudi mit ihne! Gester si mer dr ganz tag am strand gsi, s het hölle gfägt.

I ha de s spanischi sim charte kouft, so isch es billiger mir azlüte oder z schribe, i gib si nech mal via mail dri.

so i muess gah, iwr göh a chlei gah shoppe!!!

lg oli

I ha keini vier-eckigi Ouge

2005-07-05T18:21:00.000+02:00

Genau.

Wieso? Wil iech ja nid so viel Fernseh luege. Logo.
Da hani scho ei Vorteil gägenüber alli Exessiv-Fernseh lueger u grad di anderi Wuche hani di anderi Entdeckt:

I bi tendenziell glücklicher!!!

Lut em ne Artikel im Facts vom 30.06.2005 si Lüt wo jede Tag lang vorem Fernseh hocke tendenziel unglücklicher als die wo nume a halb Stund Fernseh luege. A Studie vom Zürcher Ökonom Bruno S. Frey het usigfunde das wär stundelang TV luegt eher unzfride isch mit sire finanzielle Lag, füehlt sich gsellschaftlich Benachteiligt und im Alltag bedroht. Es steiht o no das "Vielseher" a Mangel vo Sälbstkontrolle uszeichnet, was o ihr Läbensqualität beiträchtigt.

He he... Zum Glück luegeni nid viel Fernseh. I ha scho ging gseit das i a iserne Wille ha!
Aber komischerwis bin iech glich unzfride bi mit mire finanzielle Lag... Aber das het gloubs meh öppis mit de 300 Franke ztüe woni letschts Wuchenänd ha usgähe...

Chlini Notiz

2005-06-27T11:33:00.000+02:00

Nume so zum säge, mis Internet fonktioniert nüme deheime u bis es gflickt wird chani keit Iräg meh schribe... Also hoffe mer doch alli das es bald wieder fonktioniert!

Aber bis den gniesseni mal das schöne Summer Wätter!

2005-06-10T19:43:00.000+02:00

"Im Anfang schuf Gott den Himmel und die Erde. Die Erde war aber wüst und öde, und Finsternis lag auf der Urflut, und er Geist Gottes schwebte über den Wassern. Und Gott sprach es werde Licht! Und es ward Licht. ... Und Gott sah alles an, was er gemacht hatte, und siehe, es war sehr gut. Und es ward Abend und es ward Morgen: der sechste Tag.
Also wurde vollendet der Himmel und die Erde mit ihrem ganzen Heer. Und Gott vollendete an siebten Tag sein Werk, dass er gemacht hatte. ... Dies ist die Entstehung des Himmels und der Erde, als sie geschaffen wurden."

Das mag ja de meiste vo öich bekannt vor cho. Wenn ihr im Religions-Unterricht ufpasst höit. Jitze das d Wält nid in sächs Tag, vor etwa 6000 Jahre, gmacht isch worde, dürft ja de Meiste vo üns bekannt si. Für dä Fehler ir Bible gits mire Meinig nach 2 Lösige:

1. Hmmm... Verdammti Mänschheit! Cha nid emal Gottesbuech richtig witerleite! Wir Sünder!

oder

2. Z ganze isch ja sowieso es Märli (mini preferierti Variante)

Jitze es giht eifach Lüt wo sich mit aller Kraft a die Gott gegäbeni Lösing kralle, ganz egaaaaaaal obs Wisseschaftlich bewise isch das d Ärde x-millione Jahr alt isch. Aber, das isch ja nume a chlini Mehrheit oder?

Falsch. Emel nid in Nordamerika. Lut enera Umfrage vo CBS, gloube 55% vo de Amerikaner dass Gott d'Wält kreiert het. Nume 13 % (!) gäbe em Darwin (dä Type wo d Theorie vor Evolution usebracht het) rächt. Und unter däne 55 % si gebildeti und intelligänti Lüt! Da chönnti eifach chise umes a chlei unschön z Usdrucke!!! I ha a chlei uf www.answersingenesis.org gsurft... wenir glängwilet sit u lust höi öich z Ufrege, de psuechtet di Site doch amal. Es isch scho fasch a Kunst wie die Lüt es verstöh sämtlichi Wüsseschaftlichi Theorie und Entdeckige z umdrähe um ihri biblischi Schöpfig z grächtfertige. I eim Text uf däre Site wird d Evolutions-Theorie als Lügi dargstellt. Unter anderem wird gseit das dr Issac Newton o nid drah gloubt het. Das aber 1. D Evolutions Theorie denn zimlich neu isch ufcho u no rächt wenig drüber undersuecht isch worde, verliert me kes Word u 2. Dr Newton het o sini sprezielli Site cha. Obwohl är eigentlich as Mathematiker isch in errinerige blibe het är die meisti Zyt mit Alchemie verbracht. A Analyse vonere Haarsträhne wo me gmacht het i de 70 Jahr het äre gäh dass 40 mal meh Quecksilber i sim Körper isch gsi als inere durchschnittliche Person (zur Errinerig: Quecksilber isch giftig). Also cha me doch dr Newton, minere Meinig nah, nid als Argument gäge d Evolution bruche! Das bispiel isch eine vom "verdrähte" uf däre Site won iech ohni Hilf ha chönne erkenne. Was findet me de alles für erfundeni und erlogeni Sache we me i Chemie/Physik etc. usbildet isch???

Z ganze bringt me eifach zum Schudere. Wie chame nume so blöd u vorallem so ignorant si? Weni söttigi Sache läse de verliereni eifach Verständnis über d Mänschheit...

2005-06-06T20:42:00.000+02:00

nume so ne chlini Notiz zu was iech scho vorhär ha gseit wäge de Geburterate vo de Froue.

Mer höi im Büro d Wahl Ergäbnisskommentiert u mi Chef het sich überhaupt nid chönne drmit abfinde das z Partnerschaftsgsetz isch agoh worde. I sinner Worte "D Ehe isch da um z obersti, d Famille z schütze" Minere Meinig zu däre ussage wüsset ihr ja, i muess nume churz d Zahl ändere a Frou bechumt nid durchschnittlich 1.6 Kinder sondern 1.39 (Bundesamt für Statistik 2004) tendänz immer no sinkend.

Das Volk hat entschieden

2005-06-05T18:36:00.000+02:00

Ja, jitz höi mer d Abstimmigsresultate zu de Wahle becho und es isch zimlich genau so usecho wienis vorhärgseh ha: 2 mal Ja

Z Partnerschaftsgsetz isch zimlich eidütig mit 58 % prozänt agnoh worde. Mi Kommentar: Yuhui! Wobi es mi meh gfröit hetti wes dütlicher wär agnoh worde.

Schänge/Döblin isch a chlei knapper usgfalle mit 54.6 %, aber es erstunnt mi glich dass es nid no knäpper isch usgfalle.

Was mi no so interessiert het ar ganze Sach isch das d Wahl Ergäbniss vo de Kanton bi beidne Wahle zimlich ähnlich si usgfalle. Klar bim Partnerschaftsgsetz höi nume 7 Kantön drgägegstumme (UR/SW/AI/TG/TI/VS/JU) während bi Schänge/Döblin 14 Kantön d Vorlag abglehnt höi (UR/SW/OW/NW/GL/SH/AR/AI/SG/GR/AG/TG/TI).

Näbst em Wallis und em Jura höi alli wo z Partnerschaftsgsetz ablehnt höi, o Nei zu Schänge/Döblin gseit. Plus i däne Kantön wo es Nei zu Schänge/Döblin isch düregäh worde isch d Abstimmig zum Partnerschaftsgsetz zimlich knäpper usgfalle als i andere Kantön.

Was mi o no überrascht het isch das z Tessin 2 mal Nei het gseit. Klar, bim Partnerschaftsgsetz isch es nid so erstunlich, z Tessin isch ja a Katholische Kanton. Aber als Gränzkanton hetti fasch es Ja zu Schänge/Döblin, wie es ja viele andere Gränzkantön o gmacht hei...

Na ja, a interessante Sunntig!

Brasilie? Argentinie? Chile? Nei, Venezuela!

2005-06-02T21:41:00.000+02:00

Da Südamerika bi üs sowieso es aktuells thema isch, hani dänkt i rede mal vo mim lieblings südamerikanische Land : Venezuela!

Ihr fraget öich vilicht, warum Venezuela? Ganz eifach:

1. Im 1987 het a neui Partei z Land dür Staatsreforme wele modernisiere und demokratisiere. D Partei wo den ar Macht isch gsi het das natürlich abglehnt. Dr Generalsekretär vor Partei het das mit däm Satz begründet: "Wir sind keine Schweizer".
Wi geil isch das? Das het mi amüsiert wi nume öppis...

2. Wäg ihrem Präsidänt Hugo Chavez, wo a chlei spinnt.

I ha voremne paar Monat a Artikel über ihn gläse u sithär laht är mi nüme los. Da iech hie eigentli nid über sini Person und politischi Laufbahn wot rede, gibeni euch hie a gueta Link mit viel Infos : http://de.wikipedia.org/wiki/Hugo_Chavez

Also was genau het mini neugier gweckt und, vorallem, so amüsiert?

an Uszug us dr Wältwuch bricht 32/04 "Haben wir hier keinen Psychologen?" vom Sandro Benini

"....die Ausstrahlungen von «Aló Presidente». Seit seinem Amtsantritt hat Chávez rund zweihundert Folgen der Sendung bestritten, die jeweils vom staatlichen Fernsehen und Radio übertragen wird. Zwischen fünf und sechs Stunden lang preist der Staatschef Sonntag für Sonntag mit sonorer Stimme die Errungenschaften seiner «bolivarianischen Revolution».

Chavez erteilt Geschichtslektionen, erzählt Anekdoten aus seiner Kindheit und reisst Witze, stimmt Volkslieder an und nimmt hin und wieder einen Anruf aus dem Publikum entgegen. Manchmal erfahren Minister während der Sendung von neuen Regierungsplänen, und in einer Folge des Jahres 2002 entliess Chávez vor laufenden Kameras und Radiomikrofonen den gesamten Vorstand des staatlichen Erdölkonzerns, indem er die Namen der Geschassten einzeln aufrief und dabei jedes Mal mit einer Pfeife trillerte."

Stellet nech das vor! Das hetti furchtbar gäre gseh... vorallem das mit dir Pfife! Dä Ma isch jitz eifach nid ganz normal. Vorallem we me no das list:

"Chávez, der in der wöchentlich ausgestrahlten Fernseh- und Radiosendung «Aló Presidente» seiner Gattin öffentlich ankündigt, er werde es ihr morgen besorgen. Chávez, der alle einfach duzt, der den japanischen Kaiser umarmt und die Königin Spaniens mit einem Kuss begrüsst, der beim Besuch der Chinesischen Mauer zu joggen beginnt, der Saddam Hussein seine Aufwartung macht, zusammen mit Julio Iglesias ein Liedchen singt, der gegenüber dem US-Box-impresario Don King die Faust erhebt." "Mein Leben gehört euch" von Alberto Barrera Tyszka

U schins heig är, bim ne träffe mit Presidänt Putin, vorem Handschüttle, a Karate bewegig demonstriert.

Är isch sicher ke gueta Presidänt (Südamerika het leider im allgemeine a chlei müeh mit de Presidänte) u sicher o nid dä wo Venezuela brucht um us dr Chrise z cho. Aber amüsant isch är scho...

Schänge, Schänge, Schänge....

2005-05-15T17:20:00.000+02:00

I bringe jitzt nid a tirade zu minere Meinig zu Schänge/Döblin aber zu de Unklarheite wo da si.

I ha eifach z Gfüehl das alli (u das geiht vo de rächte zu de linke) unfähig si mier genau z säge was das alles beinhaltet. Jedi Partei verzehlt a chlei öppis, verschwügt aber o öppis. Klar, das tüe si bi allne Abstimmige aber das findeni isch 1. Zimlich a wichtige Schritt für d Schwitz u de möchti doch genau wüsse was das beinhaltet u 2. Isches es +500 sitigs Dossier also chasch di nid eifach so mal schnäll sälber informiere.

I ha mi erhlich gseit no nie so intensiv mitenere abstimmig befasst und informiert. I ha Arena gluet (u guet zue glost), i ha z Abstimmigs-Heftli gläse u entsprechendi Paragrafe agstriche, i ha alli Artikel woni gfunde ha (egal ob drfür oder drgäge) usi kopiert, wieder gläse u agstriche. I ha mi also wirklich igsetzt.

Ha aber eifach ging no z gfüehl das i eifach no nid alli infos ha! Das chas doch nid si! Klar, i ha mer gloubs gnueg a Meinig bildet das i mit mehr oder weniger guetem gwüsse cha gah abstimme aber i muess eifach glich di mangelndi Informations-Fluss kritisiert... Es sött doch a eifachere Wäg gäh sich a Meinig z bilde

2005-05-08T20:33:00.000+02:00

Hüt hani a Kolumne zum Thema "Vergewaltigung" gläse, und Mann, dass Thema macht mi albe verruckt!

"Jede dritte Frau wird gemäss UNIFEM in ihrem Leben einmal vergewaltigt, geschlagen, zum Sex gezwungen oder in anderer Weise misshandelt"

U während nid nume Froue opfer vo sexueller Gwalt si, si doch 95% vo de Opfer Wiblich.
Es wird gschätzt dass nume 1 vo 10 Vergewaltigunge azeigt wärde, vo däne cheme nume 1 vo 10 vor z Gricht. U falls mes de no schafft die Arschlöcher itz Gfängniss z tue, si si, we si sich guet Verhalte, spätistens in, ohh, villicht 2 oder 3 Jahr wieder dusse. (Leider hani im Internet keni gnaui Zahle gfunde) Super. Richtig Toll.
Wieso, chopf, si sämtlichi Gricht uf dr ganze Wält unfähig die "Männer" für ne aständig langi Zyt hinter Gittere z tueh? Die Vergwaltiger wo für längeri Zyt i Knast cheme, höi meistens de Froue no physischi Gwalt zuegfüegt, also höi se no gröbers Zämegschlage. Also, de wird die physischi Gwalt bestrafft u nid die Sexuelli. He Männer? Wöit ihr a Frou vergwaltige? Tüet si eifach nid schlah! De müesst ihr nid so lang itz Gfängniss!

I empfinde Verwaltigung mit Chinder-Belästigung als eine vo de schlimmste Tate, wo me cha begah. Leider wird das offesichtlich vo vilne Männer nid verstande. Drum liegt es a üs Froue, üse Wille z dürisetze, u dafür z Sorge das die Vergwaltiger ihri Grächti straf becheme.

p.s. Als i a chlei uf recherche bi gange, bini uf search.ch gange u ha "Vergewaltigung in der Schweiz" i gäh. Wüsst ihr was di ersti Site isch gsi? "Der Teeny Treffpunkt Nr.1 in der Schweiz! Bildhübsche, Supergeile Teenies für Sex!" Das seit doch alles...

2005-05-07T00:12:00.000+02:00

I ha wiedermal a lang fällige Fernseh abe hinter mier.
Öppis lustigs - The Incredibles
A chlei Drama - Spurlos Verschwunden
und a chlei Politik - Arena

U zwar het mer ir Arena über z Partnerschaftsgesetz diskutiert, was eigentlich beinhaltet das Homosexuali Partnerschafte staatlich annerkannt wärde, wie nes normals Ehepaar es o wird, mit es paarne ussnahme. Zwar dörfe Homosexuelli keini Kinder adoptiere oder sich klinisch la befruchte.

D Argumänt drfür si i mine Ouge ganz simple, 1. wärde Glich-Gschlächtlichi Partnerschafte im Gesetz benachteiligt (z.B. bim Erbschaftgsetz) u 2. findeni iech dass wenn sich es Paar liebt, ganz egal was für eis, het das Paar z Rächt die Partnerschaft gsetzlich z verbinde.

So wien iech s verstande ha si d Gägeargument so:
1. Me cha de Nachteilige süsch umgah, ohni das me es Gsetz muess schribe 2. Staatlich Annerkannti Homosexuelli-Partnerschaft tüe d "Exklusivität" vo dr Ehe u dr Famillie verletze.
3. A söttigi Annerkennig tuet z Konkubinat benachteilige

Jitzt viellicht macheni da ne Überlegigs fehler aber:
In welcher Art tuet an Annerkennti Homosexuelli-Partnerschaft d Ehe verletzte? U sit wänn heisst Ehe = Familie mit Kinder? U Konkubinat-Partner chöi o hürate we si ihri Rächt wei schütze.
Z argument wo ging vo de Abstimmigs-Gägner isch cho (näbst das Homosexualität a Sünd isch) isch das es d Ehe giht um d Familie u, vorallem, dr Nachkomme z schütze.
Aber i dr Zyt vo hüt, zieht das Argument eifach nüme. Ihr Schwitzt bechunnt a Frou im Durchschnitt 1.6 Kinder, tendenz sinkend. Zwar nid die töifsti Rate in Europa, aber definitif ir untere Hälfti. Offesichtlich isch d Ehe hüt zu tags, nüme mit em Chinderwunsch verbunde.

Drum findenis nid logisch das me Gäg es söttigs Gsetzt akämpft.

U jitzt no es paar frivoli Überlegige zur Arena:

Hübschesti Frau: Lilian Schaufelberger, vom Verein "Ja zum Partnerschafts Gesetz"
Hübschist Ma: A schwule ir zwöite Reihe
Ma mit dr Schönste Kravatte: Die Ehr geiht grad a zwöi Manner, dr Toni Bortoluzzi u dr Christoph Blocher. Dr Bortoluzzi het es sehr eleganti, pinkig Gmusterti Kravatte ane kah. Am Blocher sini isch blau gmustert gsi u het perfekt zum blaue Hemli und em dunkelblaue Jackett passt. Sehr stillvoll. Am Christian Waber sini isch o nid schlächt gsi, sis Jackett isch aber so höi zue knopfet gsi das i dänkt het är ersticke de bald (vorallem während sini religiöse Hass-Tiradene gäge Schwuli)
Lustigst Ma: Wider Christoph Blocher. Är het es paar amüsanti Kommentar bracht.
Dä wo sich am klarste usdrückt het: Dr Claude Janiak u d Lilian Schaufelberger. Beidi Pro.
Dä woni am wenigste Verstande ha: Wieder dr Blocher. Näbst de Pointe hani nüt verstande ( A was liegt das? a) i bi z blöd b) är isch z blöd c) alters unterschied d) Region unterschied e) Gschlächt unterschied - Stimmet ab!)

Also ganz a lustige abe.

p.s nächsti Wuche wird z Schenge / Döblin Abkomme ir Arena diskutiert. Drie luege! Z däm Thema chunnt mini nächsti Tirade...

Der Blick

2005-05-05T13:58:00.000+02:00

Dr Blick isch sit längerem mini Hass-Zitig # 1.
Scho nume dr Name z khöre tribt mi i Wyss-Gluet.

In letschti hani grad 2 Kommentar zum Blick gläse wo mi zerst amüsiert höi u de när nachdänklich gstumme höi.

"Eine Überlebenskampagne soll die nach eigener Einschätzung "grösste unabhängige linke Zeitung der Schweiz" (Die Wochenzeitung) retten. Nur zeigt sich schon hier ein fataler Denkfehler: Die grösste linke Zeitung des Schweiz heisst Blick."
Weltwoche Nr. 14 "Geld her!" Wöchentliche Kolumne von Christoph Mörgeli.
"Wer schadet dem Land mehr? Die Topmanagger mit ihere gesamthaftem Lohnsumme von vielleicht 170 Millionen oder die Ringier-Presse mit ihrer konstanten, simplen Kritik am Land, am System, an den Politiker und den Unternehmensführer?"
Weltwoche Nr.18 "Neid? Ich kenne dieses Gefühl nicht" Interview mit Daniel Vasella

Jitzt chani mit beidne Herre, Mörgeli und Vasella, nid wahnsinnig viel afa (u das dr Vasella z Gfüehl vo Neid nid kennt chaufeni ihm scho gar nid ab), aber mit ihrne Ussage träffe si dr Nagel ufem Chopf.

U dass chas, chopf, doch nid si! Schwitzer, ir sit doch gschider als das!

Wodka - Doch nid so nes cools wort?

2005-05-02T21:00:00.000+02:00

Wie ihr ja scho villicht khört höit, isch Wodka mi lieblings alkohol (näbem Rota natürlich). Scho nume wil me ja so herrlich Wwod-ka imne russische akzent cha säge.

Jitz hani aber nid so ne lustige bricht zum Wodka u de Russe gläse.

U zwar het d russischi Bevölkerig sit z ändi vo dr Sowjet Union vo 147 mio. uf 143 Mio. abgnoh.

Wiso?
Wäg dr höie stärbe rate vo de russische Männer. D Wahrschinlichkeit das a 15-jährig, russich Giel vorem 60 Geburstag stirbt beträgt 46 % (ir Schwitz sis 9%). D Läbeserwartig vo de Männer isch gsunke vo 64 uf 58 Jahr (ir Schwitz sis 78 Jahr).

Dr Grund vo däre höie starbe rate liegt bim Alkohl. Wodka wird in riese mängi konsumiert u meistens isches ganz billigs zügs. A Studie vom WHO het ergäh dass durchschnittlich ei Russ im Jahr 4 Liter reine Alkohl zue sich nimmt. Us däne Alkohol rüsche ergäbe sich, Verkehrs- und Arbeitsunfäll, Härz- u Läberchrankeheite u weiss nid was no alles, was alles im Tod ändet.

Krass, he?
Z nächste mal weni zum Wodka wot griffe, luegeni dases "Absolut" isch

Die Weltwoche Nr. 17 "Todestrank" von Mathias Plüss

Wisheit chunnt mit em Alter

2005-04-24T20:58:00.000+02:00

I ha grad in letschti mitemne 16 jährige giel us Neu Seeland uf MSN chatted (ha ne im ne forum woni regelmässig psueche "kenneglernt"). Und oh, mein Gott bin iech froh das i nüme 16ni bi!

Oh, zuegäbe, so schlimm isch es nid gsi.
Aber me macht ging so nes gstürm us allem! Us chline sache macht me es riese Theater, emotione loufe uf hoch toure (Himmel hoch jauzend, zu Tode betrübt) und eigentlich isch es alles so ermüedent.

I mag mi mal errinere wo d Pieren (turn lehrerin im OSZ) mal gseiht het si möchti nie meh i däm alter (14-16) si. Den hanis nid begriffe was si gmeint het. Jitzt stimmeni ihre volle härzens zu!

Papst Johannes Paul - zum Zweiten

2005-04-21T21:04:00.000+02:00

No für die wos no interessiert es paar zitat vom Papst:

"Nach dem Sturz der Regime (Nazi & Sowjet), die auf den Ideologien des Bösen aufgebaut waren, haben in ihren Ländern die eben erwähnten Formen der Vernichtung aufgehört. Was jedoch fortdauert, ist die legale Vernichtung gezeugter, aver noch ungeborener menschlicher Wesen. [.....] Es ist zulässig und sogar geboten, sich zu fragen, ob hier - vielleicht heimtückischer und verhohlener - wieder eine neue Ideologie des Bösen am Werk ist, die versucht, gegen den Menschen und gegen die Familie sogar die Menschenrechte auszunutzen"
"Errinerung und Identität"

"Was auf jeden Fall vermieden werden muss, ist die ebenso unbegründete wie demütigende Annahme, das geschlechtliche Verhalten von homosexueller Partner sei immer und vollständig dem Zwang unterworden und daher frei von Schuld. [.....] Wie bei jeder umkehrung vom Bösen kann das von göttlichen Gnade erleuchtete und gestärkte Mühen es jenen Personen gestatten, homosexuelles Tun zu lassen"
Verlautbarungen des Apostolischen Stuhls, 30. Oktober 1986

Gfunde hani die zitat i dir Wältwuche nr. 14 im Bricht "War das ein Mädchen und nicht ein Engel?"

Pfarrer Moser lässt Grüssen...

2005-04-19T21:47:00.000+02:00

Jitzt isch änlech dr neu Papst gwählt worde u wir höi hoffentich jitzt de bald a chlei ruhe... Mir si sogar di ewigi Papst-News uf d närve gange....

Also Benedikt der XVI heisst dr nöi papst, ängablich a erz-konservative (äbe am Pfarrer Moser wirds öppe gfalle).

Was wot das genau heisse?

Näme mer Johannes Paul II als bispil, eine wo doch als eher liberal golte het:

A ma wo gseht het, das Mänsche wo Preservative benütze bim Sex "böse" si.

A Ma wo Homosexualität und Abtribige als "Sünde" aluegt.

"Wöit ir Sex ha, de dörfet ihr eifach keini Kondom oder süstigi Verhüetigsmittel bruche"
Egal ob, in Afrika hundertuusigi vo Mänsche a HIV/AIDS stärbe. Egal ob, chinder uf d wält cheme, wo vo de Eltere ungewollt si, wil si gar kei Möglichkeit höi si z Unterstütze. SOLANG ME KEINI KONDOM BRUCHT BIM SEX.

D Mehrheit vo de Katholike uf diesere Wält läbe nid in Europa und Nord-Amerika. Drum sis Mehrheitlich Dritt-Wält Länder wo vo söttigi "Regle" prägt si. Länder wo doch scho arm gnueg si.

U jitzt söll a konzervative at macht cho...

abc - Mi tag isch nid für nüt gsi

2005-04-14T22:25:00.000+02:00

Hüt während dr arbeit het öpper mier si name wele buechstabiere u het agfange mit D wie Theodor. Hmm... Na ja... Wie mes nimmt...

Als i ir Elsbeth das verzehlt ha, het si gmeint es gäb es internationals buechstabier-alphabet. I ha das irgendwie no lustig gfunde u bi se gah suech. U bekanntlich, wer sucht, der findet:

A Anton / Alpha
B Berta / Bravo
C Cäsar / Charlie
D Dora / Delta
E Emil / Echo
F Friedrich / Foxtrot
G Gustav / Golf
H Heinrich / Hotel
I Ida / India
J Julius / Juliet
K Kaufmann / Kilo
L Ludwig / Lima
M Martha / Mike
N Nordpol / November
O Otto / Oscar
P Paula / Papa
Q Quelle / Quebec
R Richard / Romeo
S Samuel / Sierra
T Theodor / Tango
U Ullrich / Uniform
V Viktor / Victor
W Wilhelm / Whiskey
X Xanthippe / Xray
Y Ypsilon / Yankee
Z Zacharias / Zulu

Und befor ihr säget, "he, si cha sech ja nid entscheide!" de muess i no säge dass die links z dütsche buechstabier alphabet isch u das rächts z änglischa isch

Drum hani öppis glehrt u cha mit guetem gwüsse itz bett!

Etwas kleines für zwischen durch

2005-04-05T22:56:00.000+02:00

Höit ir gwüsst:

....das d Perle dr Gebursstei vom Monat Juni isch? (Jitzt wüsset ihr was ihr mir zum Geburi chöit schänke ;-))

... dass Optophobia dr offiziel name isch für angst ha d ouge z öffne?

... dass a gynarchie a staat isch wo vo Frau regiert isch?

... dass die drü chönige Melchior, Kaspar und Balthazar, d chönige vo Arabie, Tarsus und Äthiopie si gsi?

... dass Paramaribo d houptstadt vo Surinam isch?

Chlini Happe - Appetit Gfüllt?

2005-04-05T20:14:00.000+02:00

Als Antwort uf a Kommentar woni gläse ha, möchti säge dass es kei bestimmti längi für ne Bricht git. D idee vomene Blog mag zwar mit chline iträg agfange ha, entspricht mire erfahrig här nüme dr realität, win ihr hie http://liberal-elite.blogspot.com und hie http://schmeiser.typepad.com/the_rage_diaries/ chöit gseh. Beidi höi zum teil sehr längi iträg.

Das si zwöi vo mine lieblings-blogs : intelligänt, aktuell, persönlich, witzig und, leider für euch , uf änglisch. Sie si eigentli mini vorbilder, obwohl i nid dänke dass i sones höis level erreiche.

Und, soviel wi iech rede, wie chönnit alles ufnes paar sätz beschränke?

I hasses we lüt nid wöi gloube dass i rächt ha

2005-04-04T19:49:00.000+02:00

Eigentli hani über Religion und Naturwüsseschafte wele rede, statt däse redeni über Religion und dr Papst. Inspiriert isch dä Theme wandel vo emne Strit vo hüt em abe, wovo o dr titelsatz chunnt.
I ha drum mit mine Eltere u dr Jessica gstrite wie dr nöi papst gwählt wird. Mini mere het behouptet es gäb nume 10 Kardinäl und die wähle dr neue papst. Mi vater het gmeint nei, 10 Kardinäl sige usgwählt worde um dr neu papst z wähle (also di überige Kardinäl müesste sich zwüsche 10 entscheide). Jessica het gfragt was a Cardinal (z gspräch isch uf änglisch gsi) sig uf dütsch, und i ha befunde es gäbi sicher fasch hundert kardinäl wo dr neu papst wähle u me wüssi nid wär gwählt wird. Wär het rächt?

Jessica's Frag isch am eifachste z antworte gsi: Cardinal = Kardinal

Mi Vater het sich rächt früeh usem strit verabschidet wils ne schlicht u eifach nid interessiert het. Mini muetter het sich gar nid chönne verabschiede, da i natürlich ha müesse bewiese das iech rächt ha (a chlei a fähler vo mier, i gloube kei andere meinig ussert mini eigeni, solang i kei gloubwürdige bewies ha, wo mier z gägeteil zeigt.)

Drum si mir beidi d zitig gah hole u höi so lang gläse u gstürmt bis mer d'antworte gfunde höi.

Um öich söttige stress z erspare, und z garantiere dass ihr im Rächt sit, hie isch z ganze zäme gfasst:

Alles rueht uf 3 Wahlprinzipie, wo vom Mittelalter stamme
1. Nume Kardinäl chöi a Papst wähle
2.Es brucht a zwöi drittel mehrheit
3. Gwählt wird dr neu Papst im Konklave

Plus muess dr zuekünfig Papst nid elter wo 80 si.
I ha zwar kei genaui Zahl aber es hat ufjedefall meh wo hundert Kardinäl. Wil z ganze o rigoros gheimghalte wird, gits o keni offizielli Kandidate u o kei Wahlkampf (was nid wot heisse dass es kei interne git, nume becheme wir normalstärblichi nüt drvo)

Also im prinzip cheme alli Kardinäl uf Rome, müesse tag für tag ir Sixtinische Kappelle hocke bis a neue Papst, mit 2/3 Mehrheit, gwählt wird. Wes nach einigi Tage vo Wahle keini 2/3 Mehrheit git, de muess me sich entscheide ob me dä nimmt wo ir letschte Wahlrundi gwunne het, oder ob me zwüsche de zwöi mit de meiste Stimme no mal tuet abstimme. U de het me dr nöi Papst.
Ganz eifach eigentli, und üse Strit isch glöst.

Oh, öppis hani no vergässe:

I ha rächt kha!!!!

Politiker & Lüge

2005-04-04T18:30:00.000+02:00

Ha grad chürzlich a bericht gläse über di jetzigi schwitzer politiker u dass si hüfig ihri Meinig wächsle u o nid vonere chline lugi zrückschrecke.

E söttige bericht isch ja guet u rächt.

Aber erstunne tuets mi nid

Schwiizer Dütsch - Yeah, Baby!

2005-04-03T20:36:00.000+02:00

Nach einigem hin und här hani mi doch entschide das Web-blog uf Schwizer dütsch z schribe.

Wieso?

Das blog cha zwar jede läse (sehr gärn sogar) aber i dänke es si houptsächlich mini kollege wo ab und zue cheme cho verbi luege, u de isch es doch eifacher we alli genau verstöh was i wot säge.

U sowiso, schwizer dütsch isch doch di coolsti sprach wos git

Micheline Calmy-Rey - A Dorn i mim Oug

2005-04-03T13:51:00.000+02:00

Wie dr Titel ja scho atönt, hani scho sit eh und je müeh kah mit dr liebe Frou Calmy-Rey.

I mag mi errinere wo si i Bundesrat isch gwählt worde, hani für miech dänkt "A frou mit ere söttige Frisur cha nüt guets bewirke" Und mini vermuetige, obwohl si sich uf nüt höi basiert, höi sich grächtfertigt. Pinlichi aktione wie dr gänfer friedensplan, imischige und kommentare zu jedere Krise höi mier a frou zeigt, die ihri Sach nid ganz versteiht.

Komischerwis, gniesst si aber a erstunlichi popularität, wo vo de linke bis übere zu de rächte hebt, ir Bevölkerig. Ihri Auftritte wärde im Blick albe bis i Himmel globt.

I ha ging dänkt:"also, i gseh öppe nid ging alles, was däre Frou ageiht". Aber, ändlech hani disi wuche ir Wältwuche a bericht gläse, wo mini meinig grächtfertigt.

Hie si einigi ussage:

"Die Wirklichkeit sieht anders aus. Micheline Calmy-Rey hat in der Regierung so gut wie keinen Einfluss, keiner der Kollegen steht ihr nahe, ihr Departement ist in Aufruhr, und ihr Konzept einer neuen Aussenpolitik ist äusserst Ehrgeizig, aber schlecht durchdacht. Was noch die freundlichste Umschreibung ist:"Grössenwahnsinnig", nennt es einer ihrer hohen Beamten."

"Aus Brüssel melden Diplomaten, dass selbst Minister der EU-Staaten ich inoffiziell über den Stil der Schweizer Kollegin beklagen: Man könne mit ihr kaum normal reden, heisst es, sie wolle immer Recht haben und hört nie zu."

"Ähnlich schlecht ist ihr Ruf inzwischen in der Regierung : Pascal Couchepin kann sie nicht ausstehen und mokiert sich hinter ihrem Rücken über sie, Samuel Schmid kann sie fast physisch nicht ertragen."

"Calmy-Rey ist eine unbeliebte Chefin, erzählt ein hoher Mitarbeiter, "la vache qui rit" heisst sie intern. Man wirft ihr einen erratischen und verletzenden Führungsstil vor : wenig Information, permanentes Chaos"

I dänke chum dass dä bricht viel wird uslöse, was Frou Calmy-Rey's ansehe ageiht. Aber es isch schön mal a bestätigung z becho.

Für die wo dr ganz bericht wöi lässe, choufet d Weltwoche Nr. 13 oder klicket mal hie druf: www.weltwoche.ch

Alle Kommentare kommen aus der "Weltwoche" Nr. 13, im Artikel "Die Alleswollerin", sämtliche Rechte gehören der "Weltwoche"

Saturday Night Fever

2005-04-02T19:06:00.000+02:00

Yes, its the time of week for the majority of us to get plastered. But after 4 weeks of abstinence I am feeling ambivalent about my drunken Saturdays.

Lately, the thought of getting drunk leaves me with a feeling of overwelming guilt.

Why? Maybe it's the english goverment report, which revealed that alcohol is the cause for over 22'000 thousand premature deaths annually (check it out here http://news.bbc.co.uk/1/hi/health/3121440.stm)

Or maybe it's because, franky, I act like an idiot possessed everytime.

Whatever it is, the thought of getting pissed is not as pleasurable as it once was.

Am I having less fun? I don't know yet.
But my liver is thanking me, not to mention that I can wake up without a feeling of "Holy Shite, what did I do last night" on a Sunday morning.

I'm not turning into a saint, preaching the evils of drink. I'm sure that I still have plenty drunken parties before me. And I'm looking forward to them. I'm only saying that, every now and then, a little moderation isn't a bad thing.

I'm making progress.... Slowly

2005-04-02T16:12:00.000+02:00

Okay, at a pace, that would resemble to most people as being one of a snail with a very heavy house, I am finally getting some links posted.

I would love to give you a few comments to them, but after the extertions of posting them, I need a cuppa. And a good book.

Wow, here it is

2005-04-02T13:21:00.000+02:00

So, finally I have joined the world of blog. And, guess what? I'm excited. For some one like me, who thought long and hard before I ordered my first book-shipment on Amazon, this is seriously taking some risks. Sad? Yes. But hey, if just taken the first baby-step!